Ting 13 - Siste Mosebok

I web 2.0-utgåve.

Eg ønsker ikkje å trakke nokon på tærne, men det er altfor freistande å bruke terminologien i dei gamle Mosebøkene. Det høver godt i den opplevinga eg har hatt av dette kurset.

• Hadde ikkje heilt trua då eg starta ferda
• Gjekk frå steintavler til arbeid i skya (Google docs, wiki)
• Fann (?) vegen gjennom opprørt hav (delicious, mashups, apier)
• Stor fare for å verte blenda og danse rundt gullkalven (web 2.0)

Så får eg inderleg håpe eg får leve vidare også etter å ha kome såpass opp i høgda at eg har utsyn over terrenget, og kan finne ein god veg vidare.

Men nyttig vart det nok uansett!

Ting 12 - Moter og trender for web 2.0-stammen

- eit kvileskjær før siste spurt.

Ja, slik vert det vel - når vi endeleg forstår korleis dei ulike verktya  verkar, kjem nye motar til syne i himmelranda. Dette vil nok ingen ende ta, og vi ser vel etter kvart at det ikkje er gull alt som glimar.

I kursteksten er det gjort ei oppsummering over muligheiter innan web 2.0, og kva dette kan ha å seie for vår stamme. Nokre tankar kring dette. Ugh!

Ting 11 - Ma(r)shmallows og ap(i)er

Merkjeleg kva assosiasjonar ein får når ein sit i kveldinga å prøver å finne ut av desse ubegripelege muligheitene som mashups and apies avdekkjer. Har brukt altfor lang tid på å prøve å forstå dette!

Yr.no er velkjent, elska og hata, når time-for-time-meldingane ikkje slår til (eks. årets grillkveld er tima inn i ei opphaldsbyge). Men likevel - "skal berre sjekke yr.no"... Grei oppskrift, endeleg på norsk,  korleis dette skal gjerast. Supert! Kanskje nyttig å ha på heimesida/bloggen m.o.t. utearrangement? Tja...

Med vidare utforsking fann eg ut...

Ting 10 - "ingen tid at forlora "

Bruk Googlemaps?

Tja, vel, vel! Var først innom og leitte etter Sykkylven Naturhistoriske Museum, men då kom eg til Sykkylven kommune (rådhuset) - og det er laaangt frå Elvetun (2 km iallfall)! (Også bokhandelen Sykkylven Bok og Papir er plassert ute i fjorden, ved Sykkylvsbrua)! Her må ei korrigering til, iallfall for vår del! Kontaktinformasjonen er heller ikkje rett! Tenke, tenke - kva med kvalitetssikring av desse sidene? Kven har lagt ut denne informasjonen? Feil må iallfall rettast opp, vi kan gjere dette sjølv, når vi finn tid til det. 

Ting 9: From Googledocs to blogg

GRÜNDERCAMP 2010 - nye tankar for musea

I veke 11 hadde både Norsk Møbelfaglig Senterog Sykkylven Naturhistoriske Museum elevar frå Sykkylven Ungdomsskule på gründercamp-oppdrag. Fokus var nye måtar å marknadsføre oss på. Ivrige elevar leverte i løpet av veka både reklamefilm for Youtube (NMFS) og facebookside (SNM). I løpet av få dagar hadde facebooksida passert 200 vener - eit utruleg godt utgangspunkt for å sende ut meldingar ved arrangement og andre nyhende!

Så - vi takker dei unge for nye tankar og godt utført arbeid!

Ting 8 - Wiki - Det er lett å tala når ingen vil svara

Under siste kurssamling geleida kurshaldar oss inn i wiki-verda, og brått var dei fleste av oss inne med endå ein konto og nye muligheiter i workspace. Det var veldig greit å sleppe å sitte å lure lenge på kva ein no skulle gjere, men ein vert ikkje i god form om ein ikkje trenar...

Youtube-filmen om nytten av PBworks var kort og informativ - in the American way! Forsøk på konkretisering frå kursleiar- opprette workspace for "Berlin-turen"... Kankje, kanskje ikkje - for å ha nytte av verktyet må ein iallfall vere fleire! Er vi klare for det? Eg tvilar!

Ting 7 og 8 Kiking i andre sine arkivskuffer?

Google det er vel og bra! Som privatperson ser eg at eg stort sett dukkar opp i samband med Sykkylven Naturhistoriske Museum. Det er vel greit! Museet kjem opp og fram, som det skal! Elles er Google ein grei søkjemotor til diverse!

Men kva med Delicious?

Konklusjon: Ikkje noko for meg, hverken privat eller i arbeid!

Ting 6 - Det er en fin ting å finne venner?

... og så lett går det til...?

Hadde aldri trudd at det var museums-verket som skulle få meg til å joine facebook.Har prøvt så godt eg kunne å bremse med begge hælane i grusen, men no er skohælane rundslitne - eg glir inn i ei ny verd! Men eg er ikkje heilt overtydd om at det er gull alt som glimar!

Facebook-konto er oppretta, og vener og invitasjoner til "grupper" strøymer på. Det er så enkelt! Det er berre å klikke "stadfest" - og eg som trudde eg var frendelaus! Og at så mange vetige folk viar seg til dette mediet, er ubegripeleg! Men kva er det som er så interessant med dette, og kvifor bruke tid på dette?

Ting 5 - owls on youtube

Ja, det er ikkje berre blomar som dukkar fram når ein søkjer på "flower" på youtube. Difor prøvde eg ut "owl" igjen (avgrensa engelskkunnskap vert avslørt). Av snuttar med ulik definisjon av "owl" fall valet på ein fasinerande videosnutt av ei jaktande ugle.

From Youtube:

Sophisticated sonar of wild owls hunting in the arctic forest - BBC wildlife

(Går ikkje å bruke Embed fordi vinduet vert altfor breitt).

Det som er heilt sikkert er at det søket må vere svært spesifisert for å kunne finne noko fagleg nyttig.

Ting 4 - Naturtelefonen on podcasting og adio-museumsguide

Podcasting. Dette gjekk fort og greit. På NRK sine sider, søkte eg på "naturtelefonen", og kom rett til ei side der det stod greit korleis eg skulle fare åt for å få programmet på min lesar. No er det gjort, så no strøymer nye program frå naturtelefonen inn på min google-lesar. Kunne sjølvsagt funne andre naturvitskaplege program, men ikkje i denne omgang.

Men om eg treng denne tenesta er noko anna! Eg har fri kvar fredag slik at eg er sikra å få høyre programmet direktesendt medan eg ryddar og vaskar i heimen:-)

Audioguide. Lytt og lær! Har kika på eit par audioguidar på Kulturnett Sogn og Fjordane sine sider. Ikkje dumt! Dette har eg tenkt på i høve Sykkylven Naturhistoriske Museum ganske lenge, for å kunne kvalitetssikre den informasjonen som går til besøkjande sommarstider. Med skiftande og ikkje alltid like fagleg godt kvalifiserte vertar, kan dei som ønsker det få tilgang til ein slik audiogudie. Utstillingane i museet er som skapt for slik guiding, med nummererte montrar som syner dyra i ulike biotopar. Utfordringa er å få gjort det! Som eit "innadørs-museum" vil eg nok gi tilgang til audiogudien til dei som kjem på besøk inn i museet.

Då er vi komen så langt - 14 dagar etter skjema....

Ting 3 - Ein flik av flickr

Ja, så har også eg kika på flickr. Våga meg til å opprette konto på yahoo, og vart geleida så meir detaljert og smertefritt gjennom menyane. Brått oppdaga eg at eg sat der med eigen bildekonto i flickr. Men som den forsiktige personen eg er, har eg sikra meg at ingen andre får sjå den botaniske lysbildeserien min utan at dei er friends eller family. E-post med melding om innsynsløyve er sendt til kurshaldar :-)

Til slutt i denne omgang:

Click here for slideshow. (Eg fall for fristelsen å gjere showet public likevel.)

Men eg lurer no fælt på om eg kjem meg vekk frå alle desse kontoane, om eg ein vakker dag ynskjer det...

Det buttar imot - sjølv om det går mot lysare tider

Har no prøvt å få til lage til lysbildeframvising som gadget, eller kva det no heiter, ved å bruke Picasa nettalbum. Dette gjekk ikkje bra! Forstod ikkje kva eg gjorde i det heile tatt. Difor ser det litt teit ut i toppen her. Får sjå om eg får fiksa på dette i næraste framtid.

Elles ser eg at NOF informerer om at det er "Tid for å foreberede hekkesesongen" :-)

Ting og tang om bilde

For ein som er glad i digitale bilde av vakre blomar, fjør- eller pelskledde dyr, har eg no kosa meg ei heil lita stund. Det er som om mosen slepper taket! Gjennom utforskinga av flickr ser eg at det er mykje rart men også fine bilde folk deler med andre. Utfordringa er å vite kva ord ein skal søkje etter - og så på engelsk.

Sjå kva eg fann blant bilda for "owl" - ein herleg liten kar:-) og dette blant "flowers".

Alt så langt har vore på utforskingsstadiet, og eg prøver det eg kan å ikkje lage for mange kontoar.
"Det er skummelt, det!" 

Anna eg har prøvt:

Andre mosebok

Har no prøvt meg på litt sjølvstudie, og det er ikkje berre lett. "Tidi ho renn som elv mot fjord" i vårflaum! Svært utfordrande når ein føler det er meir famling og "lukka betre enn åttaferda" at ein brått er både på twitter og tek imot nyheitsstraumar gjennom ukjende medium!

Ting1. Blogging og twitter
Famla meg fram så no er det iallfall er ein blogg som er oppe (og går:-). Dette tek grueleg med tid! Men korleis skal vi finne andre bloggar å følgje? Kjem der ei liste over deltakarbloggar,å tru? Twitter syns eg var veldig skummel og eit udyr med mange hovud (finnast sikkert i ei av mosebøkene). Når eg ber om å følgje ein twitrar, får eg all twitringa, også den som vedkomande får adressert direkte til seg, heilt "fram" til meg. Dette føler eg ikkje er til privat bruk iallfall, men eg kan kanskje sjå nytten i å få nytt frå Norsk Ornitologisk forening, Aasentunet, eller gode tips om turmål osb. Presentasjonen til eriknude (vimeo) var grei og oppklarande.

Ting 2. Nyheitsstraumar
Dette har eg hatt tidlegare også, og dette funkar. No ser eg nytten av å ha desse straumane lenkja til ein google-konto som er på nett. Slik vert eg uavhengig av å sitje på mi eiga maskin. Har fått med meg nokre fleire, også nokre bloggar.

I det skarpe skinet frå Gullkalven vil eg uansett setje det verkelege møtet mellom menneske i høgsetet! Sjølv om eg framleis tviheld på Moses og steintavlene, vil eg no bedre kunne vurdere om eg kan nytte desse nye media på ein god måte - som eit supplement!

Første mosebok